(1967) Les Canciones de Asturies

link

Cantares de mio Asturies, guapos cantares,
que teneis el arume de los pomares
y el collor de les lluces de l'alborá,
que sabeis a sidrina de los llagares
y a besinos de moza recién casá.

Cantarinos que canten los llabraores,
y la moza que suaña con sos amores
y la madri que al neñu duerme en la cuna.
¡Canciones galanes y ensoñaores
que canten los rapazos baxo la lluna!

Cantares que 'n el tayu canta el mineru
y que per los caminos el carreteru
entona mientres suenen los esquilones.
¡Cantares que 'n fuelle trai el gaiteru
pa que llenen de gozu los corazones!

Cantarinos que salen de les quintanes
y que tienen mermullos de les fontanes
cuando a beber s'acerquen los paxarinos.
¡Qué gustu da el oyelos per les mañanes
porque suenen melgueros y molosinos.

Asturianes bravies que pa los cielos
van saliendo gozoses de los gargüelos
mientres salla 'n vasu la sidriquina:
alleranes, vaqueires... ¡Pa quitar duelos
non hay como los cantares de la tierrina!

Non son como les coples d'otros llugares
que falen de tristeces y de pesares,
poniendo en sos estroles mil amargures:
les coplines d'Asturies son rellumares
que allumbren con el fuegu de sos ternures.

El cantar de mio Asturies ye rescamplante,
ye ricu en sos tonaes y ye arrogante
como el que foi p'América y golvióse indianu,
ye amorosu, sencillu... ¡Ye tantu cante,
que hasta 'en el cielu entonen en asturianu!